എന്‍റെ നിണമൊഴികള്‍ (ഷൂ ലീ ഴൂ)

2014 സെപ്തംബര്‍ 30... ഷൂ ലീ ഴൂ എന്ന 24-കാരനായ യുവാവ്‌ ചൈനയിലെ ഷെന്‍സെന്‍ എന്ന സ്ഥലത്തെ ഫോക്സ് കോണ്‍ ഇലക്ട്രോണിക് നിര്‍മ്മാണശാലയില്‍>> താഴേയ്ക്ക് ചാടി മരിച്ചു. ദാരിദ്ര്യവും, അമിത ജോലിയും, അധികാരി വര്‍ഗത്തിന്റെ നിസ്സംഗതയും സമാസമം ചേര്‍ന്ന മരണകാരണം. ആളുകള്‍ തിക്കും തിരക്കും ഉണ്ടാക്കി മേടിക്കുന്ന ആപ്പിള്‍ ഐഫോണുകള്‍ ഉല്‍പാദിപ്പിക്കുന്നത് അവിടെയാണ്. ഇത് വായിക്കുന്ന ആരെങ്കിലും ഐ ഫോണുകള്‍ ഉപയോഗിന്നെന്കില്‍ ഒന്ന് മണുത്ത്‌ നോക്ക്‌: ചിലപ്പോള്‍ ഉണങ്ങിയ ചോരയുടെ മണം കിട്ടിയേക്കും. തിന്നാന്‍ ആളുണ്ടെങ്കില്‍ പിന്നെ കൊന്നു തരാനാണോ ആളില്ലാത്തത്? അദ്ദേഹത്ത്തിന്‍റെ കുറിപ്പ് പുസ്തകങ്ങളില്‍ ജീവിതഗന്ധിയായ നിരവധി കവിതകളും കുറിമാനങ്ങളും കണ്ടെത്തി പ്രസിദ്ധീകരിച്ച http://libcom.org എന്ന ഇടതുപക്ഷ/ബഹുജനപക്ഷ ചിന്താനിധികുംഭത്തെ  അഭിമാനത്തോടെ ഓര്‍ക്കുന്നു, നന്ദിയോടെയും. ഈ ഇന്റര്‍നെറ്റ്‌ സ്ഥലി സന്ദര്‍ശിക്കാന്‍ മറക്കല്ലേ.
http://libcom.org/blog/xulizhi-foxconn-suicide-poetry


പരിഭാഷ: I SPEAK OF BLOOD

എന്‍റെ വാക്കില്‍ ചോരയുണ്ട്,

അതില്ലാതെ വയ്യ.

പൂവാടുമിളങ്കാറ്റും

മഞ്ഞിന്‍ചെപ്പിലെയമ്പിളിയും:

എനിക്കിഷ്ടമാണ് അവയെ-

ക്കുറിച്ച് പറയാനേറെ;

പെരുമാള്‍ക്കഥകളും

വീഞ്ഞിറ്റും കവനകേളിയും-

ഇഷ്ടമാണേറെ ചൊല്ലുവാന്‍.

എങ്കിലും നിജബോധങ്ങള്‍

നിണഗീതിയല്ലാതെ മറ്റൊന്നു-

ന്റെ നാവില്‍ ചാര്‍ത്തീല്ല.

രക്തം, തീപ്പെട്ടിച്ചാളയില്‍

ഇറുകിക്കഴിഞ്ഞ്

സൂര്യാംശു തഴുകാത്ത

തൊഴിലാളും പെണ്ണും

കുമിഞ്ഞിറങ്ങുന്ന

വാടകക്കൂട്ടിലെ രക്തം.

ദൂരെ ദൂരേക്ക്‌ കെട്ടിച്ചയച്ച

ഗതിയറ്റലയും സ്ത്രീകള്‍,

തട്ടുകടയില്‍ നാടന്‍ കൊതി

വില്‍ക്കും സിഹ്വാന്‍ പയ്യര്‍,

ഹെനാനിലെ കിഴവിത്തള്ളകള്‍

വില്‍ക്കാന്‍ നിരത്തിയ വഴികള്‍;

പിന്നെ ഞാന്‍ പകലാകെ

ജീവിതമെത്തിപ്പിടിക്കാനോടി-

ത്തളര്‍ന്നീ രാത്രിയില്‍

കവിതയ്കായ്‌ കണ്‍പാര്‍ത്തിരിപ്പൂ.

ഞാനിവരെക്കുറിച്ചാണ് പറയുന്നത്,

ഞങ്ങളെക്കുറിച്ച്.

വാഴ്വിന്‍ ചെളിപ്പരപ്പില്‍

വലയുന്ന ഞങ്ങളുറുമ്പുകള്‍.

തൊഴിലിടപ്പാതയിലുടനീളം

പതിഞ്ഞുണങ്ങും ചോരമൊട്ട്,

പോലീസ് പടയോടിച്ചിട്ടടിച്ചും,

യന്ത്രം ചതച്ചതും, ചോര.

ഉറക്കക്കേടും വ്യാധിയും 

തൊഴില്‍ച്ചേതവും ആത്മവധവും

വാക്കിന്‍ പൊട്ടിത്തെറികളും

വകഞ്ഞുമാറ്റി ഞാന്‍,

പവിഴനദിപ്പൊഴിയില്‍*

പണിയിടയാജ്ഞയാം

കൊലവാള്‍ പിളര്‍ത്തിയ

ദേശനാഭിയില്‍ നിന്ന് ഞാന്‍

ഇതെല്ലാം നിന്നോടു പറയുന്നു,

നാവടഞ്ഞുപോകുന്നെന്‍-

നാവു വിണ്ടുപോകിലും.

മൌനം, ഈ യുഗത്തിന്‍

മൌനം ചിന്തിയെറിയാന്‍,

നിണഗാഥ ചൊല്ലുവാന്‍, പിന്നെ

വാനം പൊളിഞ്ഞു  വീണതും.

എന്‍റെ നിണമൊഴികള്‍,

വായാകെ ചോപ്പ്.

*Pearl River Delta, booming economic zone in China